Curriebeker-kritici kyk op hul neus

Curriebekerrugby, wat enkele weke gelede nog as ʼn uitgediende en minderwaardige reeks afgekam is, is dié naweek weer koningskos.

Die halfeindwedstryde tussen die WP en die Goue Leeus en die Haaie en die Blou Bulle sal derduisende kykers voor TV-stelle laat saamdrom.

Daarby kry die Springbokke, hul afrigters en ondersteuners nóg ʼn kans om te kyk of die wêreld se toonaangewende span kwesplekke het. Nieu-Seeland speel in Brisbane teen Australië in ʼn wedstryd wat ook regstreeks uitgesaai word.