Nóg ʼn tandeknersery oor rugby op Loftus

NOG ʼn tandeknersery op Loftus Versfeld wag op mense wat dié naweek ʼn bietjie rugby wil kyk; hetsy in die stadion in Pretoria of op televisie.

Die Curriebekerwedstryd tussen die Blou Bulle en die Westelike Provinsie sal seker nie so senutergend soos verlede week se toetswedstryd wees nie, maar die emosies tussen die ondersteuners sal ouder gewoonte hoog loop.

Eintlik kraai sokker dié naweek koning, want Engeland, Nederland, Duitsland, Portugal en Griekeland se duisende ondersteuners in Suid-Afrika kan op TV na dié lande se wedstryde in die Europese Nasiesliga kyk.

Daarby word die SA sokkerspan se skermutseling teen die Seychelle en die twee krieketwedstryde tussen Suid-Afrika en Zimbabwe ook regstreeks uitgesaai.